Puisque certaine jouvencelle me traistoit de complaisant, cy me faisant mortelle offense, je choisy pour mon avocat Maistre François Rabelais, afin qu'iceluy rappelle à nostre bon peuple que la gauloiserie point n'est bien grand péché :

Je me torchay une foys d'un cachelet de velours de une damoiselle, et le trouvay bon, car la mollice de sa soye me causoit au fondement une volupté bien grande;
une aultre foys d'un chapron d'ycelles, et feut de mesmes;
une aultre foys d'un cache-coul;
une aultre foys des aureillettes de satin cramoysi, mais la dorure d'un tas de sphères de merde qui y estoient m'escorchèrent tout le derrière; que le feu sainct Antoine arde le boyau cullier de l'orfebvre qui les feist et de la damoiselle que les portoit !
Ce mal me passa me torchant d'un bonnet de paige, bien emplumé à la Souice.
Puis, fientant derrière un buisson, trouvay un chat de mars; d'icelluy me torchay, mais ses gryphes me exulcérèrent tout le perinée.
De ce me guéryz au lendemain, me torchant des guands de ma mère, bien parfuméz de maujoin.
Puis me torchay de saulge, de fenoil, de aneth, de marjolaine, de roses, de fueilles de courles, de choulx, de bettes, de pampre, de guymaulves, de verbasce (qui est escarlatte du cul), de lactues et de fueilles de espinards, - le tout me feist grand bien à ma jambe ! - de mercuriale, de persiguire, de orties, de consolde; mais j'en eus la cacquesangue de Lombard, dont feu gary me torchant de ma braguette.
Puis me torchay aux linceux, à la couverture, aux rideaulx, d'un coissin, d'un tapiz, d'un verd, d'une mappe, d'une serviette, d'un mouschenez, d'un peignouoir. En tout je trouvay de plaisir plus que ne ont les roigneux quand on les estrille.
[...]
Mais, concluent, je dys et maintiens qu'il n'y a tel torchecul que d'un oyzon bien dumeté, pourveu qu'on luy tienne la teste entre les jambes.
Et m'en croyez sus mon honneur. Car vous sentez au trou du cul une volupté mirificque tant par la doulceur d'icelluy dumet que par la chaleur tempérée de l'oizon, laquelle facilement est communicquée au boyau culier et aultres intestines, jusques à venir à la région du cueur et du cerveau. Et ne pensez que la béatitude des heroes et semi-dieux, qui sont par les Champs Elysiens, soit en leur asphodèle, ou ambrosie, ou nectar, comme disent ces vieilles ycy. Elle est (scelon mon opinion) en ce qu'ilz se torchent le cul d'un oyzon, et telle est l'opinion de Maistre Jehan d'Escosse.
- François Rabelais, "Gargantua", (1542) Chap, XIV